第44章(第3/3 页)

爷忒啥个写意哉，连搭仔自家才匆曾晓得是啥场花。我同十全两家头成日成夜伏侍四老爷元拨困。幸亏个先生吃仔几帖药，好仔点；勿然，四老爷再要生下去，我同十全一径来里伏侍，倘忙两家头才过仔，一淘生起来，难末真真要死哉！大少爷阿对？”

鹤汀暗忖这段言词，亏他说得出口，眼看着诸十全打量一番。诸三姐复道：“大少爷阿晓得？外头人再有点勿明勿白冤枉倪个闲话，听着仔气煞人哚！说四老爷该个疮，就是倪搭过拨俚毒气。倪搭末不过十全搭仔我，清清爽爽两家头，啥人生个疮嗄？要说十全生来浪，四老爷两只眼睛阿是瞎哉嗄？”说到这里，一手把诸十全拖到鹤汀面前，指着脸上道：“大少爷看囗。四老爷面孔浪，倪十全阿有点相像？”又捋出诸十全两只臂膊，翻来覆去给鹤汀看了，道：“一点点影踪才无拨（口宛）。”诸十全羞得挣脱身子，避开一边。

鹤汀总不则声，但暗忖这诸三姐竟是个老狐狸，若实夫为其所愚，恐将来受害不浅。当下实夫嗔着诸三姐道：“外头人闲话听俚做啥！我总勿曾说耐末，才是哉（口宛）！”诸三姐笑道：“四老爷生来勿曾说啥。四老爷再要说倪，故末倪要……”诸三姐说得半句即缩住嘴，笑而下楼。

实夫方向鹤汀笑道：“耐末也（要勿）起啥个花头哉。耐自家洋钱自家去输，勿关我事。故歇我手里拿得去栈单，倘忙输脱仔下来，教我转去阿好交代？”鹤汀默然不悦。实夫道：“栈单来里小皮箱里，要末耐自家去拿，我勿好投耐。”鹤汀略一沉吟，起身就走。实夫问：“阿要钥匙？”鹤汀赌气不要了。

楼下诸三姐挽留道：“大少爷再坐歇囗。”鹤汀也不睬，一直出了大兴里，仍回长安客栈；心想：实夫既然怕不好交代，又教我自家去拿，难道说我偷的不成？似这等鄙琐悭杏，怪不得诸三姐撮弄他、摆布他。我如今也不去管他，但是殳三一款，如何设法？想来想去，只好寻出两套房契，坐轿往中和里朱公馆谒见汤啸庵，托他抵借一万洋钱。汤啸庵应承，约定晚间杨媛媛家回话。李鹤汀先去坐等。

汤啸庵送客之后，寻思朱蔼人处所存有限，须和罗子富商量，即时便去兆富里黄翠凤家相访。罗子富正在楼上房里，请进厮见。适值黄二姐在座，也叫声“汤老爷”。汤啸庵点点头，道：“长远勿见哉，生意阿好？”黄二姐道：“生意勿局，比仔先起头悬迸哚。”黄翠凤冷笑叉口道：“耐是有生意勿做（口宛），啥勿局嗄！”